IKsTn

Irakasleok ezagutzak trasmititzeaz gain irakaste-ikaste prozesu horretan ikasleak ere bagara. Etengabeko hobekuntzaren bidean guk ere asko dugu ikasteko. Egungo egoerara moldatu eta testuinguru horretan irakatsi behar dugu. Hori horrela izanik onartu behar dugu Teknologia Berrien garaian gaudela eta horretara egokitu behar garela. Zentzu horretan beraz, irakasgai honek baliabide batzuk ikertzeko aukera eman digu.

Gure garaiko irakasleok ordenagailuak, programaka, hedabideak... ezagunak ditugu baina ez ditugu askorik erabili gure hezkuntza prozesuetan. Gaur egungo ikasleak berriz, teknologia berriekin jaio dira, euren euskarri dira. Horregatik esan genezake ezjakinak garela eta gure ikasleak berriz adituak. Baina beldurrak kendu behar ditugu, dakigunarekin hautsi eta eginez ikasi. Bide horretan izaten ari garen emaitzak ikusten ditugu eta motibatzen gara (ikaskide batzuek adierazi dute euren blogetan zein harro sentitzen diren egindako lanengatik!). Ulertzekoa da, emaitzak ikusgarriak dira eta.

Ikastearekin ordea ez da nahikoa. Hausnartzea falta zaigu eta guzti honi aplikazio praktikoa bilatu. Nik argi daukat teknologiak ikasleengana hurbiltzeko balio zaizkigula. Hauek kontrolatzea eta maneiatzen jakiteak, aukera anitz ematen dizkizula eskolako didaktikak antolatzeko. Ikasleak berriz, ezagutzen dituzten euskarriak erabiltzen dituzte, gustatzen zaizkie eta horrek fustrazioak ekiditen laguntzen die. Bestalde klaseko lau hormetatik ateratzen ahalbidetzen die eta beraz egindako esfortsuaren emaitza ere jasotzeko aukera izaten dute.

Irakasgai honek beraz, horren inguruan pentsarazi digu. Teknologia berrietatik at zeuden/geudenoi hurbiltzeko aukera eman digu, geure kabuz jolastuz, nahasiz, ikertuz ikasten joan gara. Ikaste prozesuak berez izan beharko lukeena.

Irakurri izan dudanagatik gainera, ez da bakarrik ikastea izan, batzuongan jakinmina piztea ere lortu du ikasgai honek eta bide honetatik baliabide berriak ezagutzen jarraituko dugu. Horretarako internetek aukera paregabeak eskaintzen ditu. Jarraitu nabigatzen, ikasten!

"Ariz ariz ikasten da"

Euskaraz bizi nahi dut

Baliabideak

Aurreko sarreraren batean komentatu izan dut eguneroko produktuak kontsumitzeak (kultura kontsumitzeak) lagundu egiten duela hizkuntzak ikasten. Esaten dute lurralde batzuetan espainola hitz egiten ikasten dutela telenobela hegoamerikarrak ikusten.
Nik ikasleei euskaraz kontsumitzea gomendatzen diet. Motibatzen dira, interesagarriak suertatzen zaizkien edukiak ikusten dituztelako, eta errazago jasotzen dituzten ezagutzeak.

Irakasleok, arazoak izaten dugu euskarazko edukiak topatzeko, baina egon badaude. Hona hemen euskara ikasteko baliabideak eskaintzen dituen web orria:

IKASBIL

Bidea egiten

Hona hemen apirileko lana: Teknografia. Nire bizitza labur-labur pare bat minututan.

BIDEOA ikusteko egin klik.

Egunean hitz berri bat

Berriro dakart euskaljakintza blogak ematen duen beste aukera bat. Maite Goñik, euskara irakasleak, bere ikasleekin batera elikatzen duen blog honetan euskara ikasteko baliabide anitz aurki ditzakegu. "Gaurko hitza" horietako bat da. Egunean hitz bat proposatzen dute, hiztegiko definizioa ematen digute eta adibideak proposatu. Blogean idazten duten bezala " Egunez egun eta hitzez hitz zure hiztegia aberasten lagunduko dizugu".
Modu dibertigarrian ikasteko JOKOA ere sortu dute.

Sartu eta probatu!

Euskara ikasteko tribial jokoa

Beste sarrera batzuetan komentatu izan dugu jokoak zer nolako garrantzia duen ikasketa prozesuan. Oraingoan nik neuk sortutako joko bat ekartzen dut blogera: Euskara ikasteko Tribial jokoa.

Koloredun tableroa sortu dut eta horrekin batera galderen txartelak egin ere. Kolore bakoitza euskara hizkuntzaren aspektu ezberdin bat lantzeko balioko digu: deklinabidea (urdina), aditza (gorria), lexikoa (berdea), gramatika (arrosa), esapideak (horia) eta bukatzeko euskal kulturaren inguruko galdera orokorrak (laranja).

Maila ezberdinetarako txartelak egin ditut Hizkuntza Eskakizun mailak kontuan hartuta. Hala ere edozein mailatako txartelak egin daitezke.

Hizkuntzaren aspektu ezberdinak lantzeko joko anitz sortu daitezke. Eragin buruari!

Liburuaren hausnarketa

"Introducción a la Tecnología Educativa", Manuel Area Moreira idazlearen liburua irakurri osteko lana:

LIBURUAREN LANA

Hizkuntza ekologia

Hizkuntzaren ekologia edo ekolinguistika azken aldian maiz entzuten ari garen terminoa da. Hizkuntzalaritza eta ekologia uztartzen dituen korrontea da. Hizkuntza ekologiak, hizkuntzen arteko harremanak hala nola hizkuntzen eta inguruaren arteko harremanak ikertzen ditu eta beraz, erabiliak diren gizarteak ere.

Adituek diote hizkuntza-aniztasun  gehien duten lurraldeak bioaniztasun handienekoak ere badirela. Biak dira lurraren aniztasunaren adierazle. Beraz, bata babesten badugu (bioaniztasuna), zergatik ez bestearekin berdina egin?

Ideia hauen inguruan hausnartzeko webgune bat ekartzen dut gure blogera:

HIZKUNTZA EKOLOGIA

Bertan, helduekin zein gazteekin, soziolinguistikaren adar hau lantzeko aukera izango duzue. Azalpen gisa filma  batzuk ikusi daitezke. Bertan munduko egoera eta Euskal Herriko hizkuntza egoeraren ikuspegi xume bat ematen da. Ariketatxo batzuk  egiteko aukera ematen du eta hizkuntza ekologiaren inguruan gehiago jakiteko baliabideak ere eskaintzen zaizkigu.

Esan bezala, ideia aproposa helduekin zein gazteekin lantzeko eta teknologia berriak bitartekari!

Euskarazko produkzioa

Helduen euskalduntzearen zutabeetako bat mintza praktika izaten da. Horretarako beharrazkoak izaten dira hausnarketarako gaiak.

Gaurkoan euskaraz egindako laburmetrai bat proposatzen dut. Ulerterraza, testu sinpleak eta klasean komentatzeko aukera ematen duena. Nire ikasleek ikusteko aukera izan dute eta asko gustatu zaie. Espero dut zuen gustukoa izatea.

Jokatu eta ikasi

Jokoa ikasketa prozesuan baliabide ezin hobea izaten da. Haur edo gazteen hezkuntzan ez dugu zalantzarik izaten baina helduen kasuan ere ezinbestekoa izaten da. Euren haurtzarora bueltatzen dira eta aurreritzietatik askatzea lortzen dute. Modu horretan edukiak arduragabe jasotzen dituzte.
Orain dela hilabete batzuk euskaljakintza weborrian, Maite Goñi irakasleak sortutako HITZAPASA jokoa deskubritu nuen eta atzo bertan nire taldeetako batean erabili ere. Euskara lexikoa ikasteko balio duen jokoa da eta hasieran horrela erabili genuen (bestelako gaien ingurukoak ere badaude). Baina buelta ere eman ahal zaio jokoari eta ikasleei beraiei eskatu euren erroskoi propioa sortzeko eta bide batez definizioak egiten ikasten dute.
Hona hemen HITZAPASA jokoaren txokoa:

http://www.euskaljakintza.com/hitzapasa/

Lehenengo hitzak...

Blog honi hasiera emateko nere lehenengo hitzak dira hauek. Ongi etorria eman nahi dizuet lehenengo aldiz gune hau bisitatzen duzuenoi. Apurka bloga eraikitzen, osatzen eta edukiz betetzen joango naiz. Bide horretan zuen laguntza ere ondo hartu izango da. Euskara, euskara prestakuntza eta helduen hezkuntzaren inguruko edozein ekarpen bere txokoa izango dute honetan, hau izango da gure ontzia.